| تبليغات | X |
نعمانشاه نامهنين محتواسينان مطللع اولدي و چوخ خوشحال اولدي مخصوصاً شاهزادهنين تولدنن كه اوني تربيت الماق ايچون تاپشيراجاقلار بلا توقف سفر تداركي گوروب اوغلي منذري كه شجاعتده بينظيريدي جانشين ايديب ئوزي يوز اللي نفر سواريله ايرانه طرف حركت ايدي سويونديقندان ايكي منزلي بير ايديب ايرانين پايتختينه يتيشدي شاهه نعمانشاهين گلماقين خبر ويرديلر شاه امر ويردي تمام امراء پشوازه گئديب چوخ جلال و عزتله نعمانشاهي شهره گتيرديلراو با اينكه چوخ يورولمشدي بدون تاخير شاهين حضورنه گئديب شاهزادهنين تولدنه گوره تبريك ديدي شاه اونا چوخ احترام ايديب ئوز يانندا يره ويردي، بير ساعتدن سورا شاه حرمه گتدي نعمانشاهده بير قصر كه انون ايچون تعيين ايلميشديلر كئديب استراحته مشغول اولدي آخشام باشي شاه حرمدن خارج اولوب تخت سلطنته جلوس ايلدي پس تمام وكلاء و وزراء و امراء ئوز يرلينده اتوردولار نعمانشاهده حضوره يتيشيب جشن ملوكانه دوتدولار شام صرف اولاندان صورا ساقيلر مي دولانديريب مطرب ورامشگرلر مجلسه گليب عيش و نوشه مشغول اولدولار شاه اوزون نعمانشاهه توتوب ديدي وزيرلر بيله صلاح بولوللر كه شاهزاده بهرامي سن تربيت ايدهسن نعمانشاه ديدي قبلهگاها بو بير مهم ايش دگل من جاناً و مالاً هرنه كه سيز امر ايلهسز اطاعت ايلرم شاه امر ويردي شاهزادهني مجلسه گتيرديلر تمام حضار اوني گورماقدان خوشحال اولدولار علي الخصوص نعمانشاه كه خداوند شاهزادهنين محبتين انون اورهگينه سالدي صباح بهرامي آناسي ايله نعمانشاهه تاپشيروب نچه يوك قيزيل ايله روانه ايلديلر شاه دستور ويردي دورت آغاجهجن مشايعت ايلديلر مسافر لر نچه گونن سورا يمنه وارد اولدولار يمن اهلي پشوار ايلديلر شاه امر ويردي شاهزاده و آناسي ايچون عليحده قصر تهييه ايلديلر بير نچه گوندن سورا شاه اوغلي منذري چاغيروب ديدي مهندسلري اطرافه يولا تا هريرده آب و هوا خوش اولسا بير عمارت بنا ايلسونلر مهندسلر بير خوش آب و هوا ير تعيين ايديب شاهه خبر ويرديلر شاه سمار آدلي بير بنا روميدن چاغيروب عمارتين دوزتماقين اونا محول ايلديلر سمار چوخ كوشش و سعي دن سورا بر عمارت بنا ايلدي كه سحر گون چخاندا ارغواني، نهارچاغي طلايي و آخشام چاغي گوموش رنگنده گوروكوردي نعمانشاه بو قصري گورماقدان چوخ خوشحال اولدي و آرتيق سماره محبت ايليوب اونا قابل انعام ويردي سمار ديدي اگر بوليديم نعمانشاهين بوقدر منه محبتي وار بير عمارت دوزلدهرديم كه آخشامهجن اون رنگ اوردا گوزه ووراردي بو سوز شاهين خوشونا گلميوب امر ويردي اوني قصرين دامننان يره آتديلار بيچاره سمار ئوز عمريندن بهره گورمدي اينديده او عمارت قالير و آدي خورنق دور شاه سورالار ئوز عمليندن جنون گتيريب ديوانه اولديبير جون چولده مفقودالاثر اولوب هر قدر اوني آختارديلار بير اثر تاپولمادي اوغلي منذر تخته اتوروب پادشاه اولدي الله منذره بير اوغول ويردي كه بهرام ايله قصرده پرورش ويرديلر تا اون اوچ ياشيندا اولدولار تمام علوم به خصوص تيراندازليقي اورگشديلر چون بهرام گورخر شكارينا چوخ علاقسي واريردي بهرام گور لقب ويرديلر القصه بهرام گونوزلر شكاره گئديردي گجه لر عيش و عشرته مشغوليدي وقتيكه شكاره گئديريدي گورخري سوروسون توتوردي اولار كي دوت ياشندان از عمر ايلمشدي آزاد ايديردي و اولار كي دورد ايلدن چوخ عمري واريدي شكار ايديردي او گورخرلري كه آزاد ايليردي ئوز آدينا مهر دوزتديرمشدي اولارين ساغ بودونا وروب آزاد ايديردي اعلان ايلمشدي هر كس منيم شكارلاريمي شكار ايلسه او آداميدا من شكار ايدهجاقام اونا گوره هر كس بو گورخرلردن شكار ايديريدي چون بهرامين مهرين گوروردي اوني اوپوپ آزاد اديردي بهرام بو وضعله زندهگانليق ايليردي بير گون بهرام و منذر و تمام وزراء و امراء شكاره گتديلر چولده دولانيرديلار كه ناگاه چولون بير طرفدن توزقاخدي بهرام ايستدي او توزون علتين بولسون آتيت قووب اونا طرف گتدي منذر و اوبيرسي لر اونون دالسجا روان اولدولار بهرام چون اورا يتشدي گوردي بير شير بير گورخرين ايستير بئلين سنديرسون همين كه بهرام اوني گوردي بي تاب اولوب در حال كماني الينه آلوب بير تير چله كمانه قويدي شيرين بئلينه دگوب گورخرين قارننان چخوب يره گتدي شير و گورخر هر ايكيسي يره يخلديلار چون منذر و اوبيرسيلر بو هنري گوردولر حيرتده قالوب هامي آفرين ديدي و بهرامين قوت و شجاعتدن تعجبده قالميشديلار چون اولار شكار گاهدهن قايتديلر بو سوز شهريده شهرت تاپدي هامي دسته دسته گئديب تماشا ايليرديلر منذر امر ويردي خورنق قصرنده شير و گورخرين عينا همان حالتنن كه بهرام آت اوسته اوتوروب و تيري شير و گورخرين سينهسيندن چخوب يره گچبدي نقاشلق ايديب ديواره نصب ايلديلر اوبيرسي گوندهكي كيمين سوار اولوب شكاره گئتدي هر طرفه آت قووردي و منذرده سوارلاريايله بهرام بير گورخر گوردي كي قارني قار كمي آغ، كورهگي لعل كيمي قرمزي دي و اوبيرسي يرلري بير عجيب و غريب وضعله منقش ايدي بهرام چون بو گورچكليقدا بير گورخر گورمميشدي چوخ مسرور اولوب ديدي كه گرهك اوني ديري دوتام بو خياليه كمندي اله آلوب آتي قوودي
ناقلين ادامه سينه گلن هفته پيگير اولون كه گوراخ نوولدي !
اللهين آدي و يادينن
قول ويرديغم كيمي هفت پيكر كتابيدان كه منيم بويوك بابام بو نقلاري تعريف ايدردي كي بولاري بيزيم اوستاديميز مكتبده بيز تعريف ايدردي كه اولارين كلسي يدي دانا داستاننان تشكيل تاپير و هر بيري اوز يرينده بير گوزل و اشيدملي داستاندي اونون اول قسمتيني كه ايرمي گئجده تعريف ايلميشدي و منده اوز بابامنان ايشتميشم شوقيله اوتورب اولاري اوز خاطره دفتريمده ثبت ايتميشيديم و بوردا بو دفتري آچاننان سونورا لازم گوردوم كي دوسلار اوچون بو دفترده يادگار قويام تا دوسلار دا استفاده لنيب و بو طريقينن هم بير رحمت پايي منيم بويوك باباما و هم بير يادگار اولسون بنده حقيرين طرفيدن عزيز دوسلاريما.
بير گون واريدي بير گون يوخدي تاريدان غير از هيچ كس يوخدي
تاريخ يازانلار معتقد ديلر كه اسلام دولتي ظهور ايلمميشدن قباق ايران مملكتينده دورت طبقه سلطنت ايليردي كي اسكندر معروف كيانلارين آخر پادشاهي محسوب اولوردي.
اولار ايرمي سگز پادشاهيدلار كه اولي اردشير بابكان و اون دوردمنجي سي يزدگرديدي كه چوخ سخت دل و بي مروت آداميدور خلق اونان راضي دگلديلر قرخ ياشيندا اونا الله بهرامي عطا ايلدي او زمانه جن اولادي المامشدي تا اوزونه وليعهد قرار ويرسون بير طرفدن قوجاليق آثاري وجودين احاطه ايديب بير طرفدن بي اولاديليق غصه سي اوني پريشان ايلميشدي بير گون اوزون گوي سمتينه دوتوب عرض ايلدي الهي ! اي مني خلق ايدن الله . ايله ايله كي ساساني دودماني منقرض اولماسين هر كس كه سنون قاپووا گليب محروم ايتمميسن و مايوس قيترميوبسن خلاصه چوخ آغليوب مناجاتدن سورا حرمه گتدي . پادشاهين دعاسي مستجاب اولوب نطفه اولاد آناسينين بطننه دوشدي بير مدتدن سورا حامله اولدي شاهه مژده ويرديلر. شاه بو خبري اشتماقدان اوقدر شاد اولوب كي اوچ دورت يول تختيدن اياقه دوروب يره اتوردي امر ويردي خزينهنين قاپوسون آچديلار. اوقدر فقرايه قزيل ويرديلر كي بير نفر فقير شهريده قالمادي دوگوز آي دگوز گون دگوز ساعتدن سورا بير گوزل اوغلان دنيايه گلدي شاه بو مژده دن اوقدر مسرور اولدي كه امر ويردي تمام شهري چراغان ايديب جشن دوتدولار و تمام ولايتلر كه انون زير فرماننده ايدي يدي ايل مالياتدن معاف ايلدي سورا هر نه كه منجم و ستاره شناس واريدي احضار ايديب امر ويردي شاهزادهنين طالعين ملاحظه ايلسونلر منجملر اوز كتابلارينا مراجعه ايديب آثار مسرت و شادي، اولارين بارسينده پديدار اولدي عرض ايديلر الحمدالله كه شاهزاده نين طالعي چوخ ياخشي دور و يدي اقليمي تحت تصرفه گتيرجاق شاه چوخ خوشحال اولوب تمام منجم لره خلعت ويردي و اولاري چوخ حرمت و عزت له يولا سالدي شاهزاده نين آدين بهرام قويوب اوني چوخ دقتيلن پرورش ايليردي، منجم لر اوز يرلرينه گئديب ديديلر اگر شاهزاده آتاسينين يانيندا آموزش تاپسا پادشاهين اخلاقي اونا تاثير ايديب اودا سلطنت ايدنده رعيته ظلم ايدهر . اونا گوره قباقجه چاره ايلياق هامسي هم راي اولوب پادشاهين درگاهينه گتديلر اجازه آلانان سورا شاهين حضورنا گئديب عرض ايلديلر كه اگر شاهزاده بير يرده بوييه كي اورانين آب و هواسي ياخشي اولا شاهزادانين وجودنده تاثيري چوخدي پادشاه بو سوزي تصديق ايلدي بونا گوره كه قباقكي اولادينين ئولماقندان گوزي قورخمشدي در دم امر ايلدي تمام امراء و وزراني جمع ايدوب بو سوزون باره سينده مشورت ايلدي تمام حضار بو سوزي تصديق ايلدي وزير اياقا دوروب ديدي بو مطلب هاميه معلوم دي كه قوم عرب فصاحت و بلاغت و شان و ذكاوتده تمام ملت لرين ايچينده مشهوردي حكمدار يمن كه ئوزوني پادشاهين بندهلريندن بولور اگر مصلحت بولسز يمن حكمداريني بورا دعوت ايدوب شاهزاده ني اونا تاپوشيراق كه شاهزاده ني پرورش و تربيت ايلسون هامي وزيرين تدبير و هوشينه آفرين دييوب هامي بوني مناسيب و مصلحت گوردي شاه دبيري چاغيروب امر ويردي بو كيفيتي يمن حاكيمينه يازسون دبير نامه ني يازانان سورا پادشاهين حضورنه گتدي شاه نامهني اوخويوب مهر ويردي پس نامه ني بير قاصده ويرديلر كه فورا يمنه آپارسون قاصد گجه گونوز يول گيديب آز مدتده يمنه يتيشدي فورا نعمان شاهين بارگاهنا گيديب نامهني تسليم ايلدي نعمانشاه سوروشدي بو نامه ني كيم يوليوب؟ قاصد ديدي بو نامه ايران پادشاهينين طرفنندور. نعمانشاه متفكر اولدي كه نه حادثه اوز وروب كه ايران پادشاهي اونا نامه يازوب پس نامهني قاصدن الوب مطالعه ايلدي.
ادامهسي وار
